【本報訊】年僅12歲的數學迷莫子謙今年越級挑戰文憑試（DSE）數學科，成為今屆最年輕考生。子謙10歲時越級挑戰IGCSE數學科並勇奪A級，今次花了半年時間備戰文憑試，結果考獲2級合格成績，自覺失手，「如果小心啲會高分啲」。
子謙是本港歷來最年輕的文憑試考生之一，去年另有一名12歲學生報考。在元朗信義中學將升讀中二的子謙自小鍾愛拼圖、數獨等邏輯玩意，小四時覺得學校數學課程太易，「問老師有冇難嘅、得意嘅數學，老師就畀咗張六年級嘅工作紙我」。代數是他的最愛，「喺一堆公式搵番未知數，好似一個故仔，有咗結局但搵番開始嘅原因」。
受教師啟發，子謙更迷戀數學，小五應考與中學會考程度相約的英國劍橋IGCSE數學科，考獲A級佳績（最高級別為A*）。子謙遂提升目標，決定花半年時間備戰，報考文憑試數學科。
子謙沒有補習，卻有一位私人導師，就是曾任初中數學教師的媽媽。莫太說：「佢話想試吓DSE咪畀佢試！」她先教授DSE課程內容，再讓子謙自行做練習及歷屆試題，遇疑難再加以指導。
子謙也會看YouTube參考大學教授計算方法，「要搵最快嘅方法計到先，慳返啲時間做其他難題目」。準備文憑試期間，他每日花1至2小時做練習，形容文憑試課程艱澀，但視之為最佳挑戰。
子謙最終考獲2級合格成績，坦言不太滿意，父母卻感驚喜。莫父直言「冇諗過佢有分」，認為今次經驗讓子謙明白天賦需努力配合才能成功。莫父任職傳道人，不信「贏在起跑線」，讓兒子自行發掘興趣兼訓練自學能力。
子謙暫沒計劃明年再挑戰，「之前準備文憑試，學校成績退步咗少少，中文科要追番」。話雖如此，他正學習難度更高的英國A level數學課程，考慮再越級挑戰，冀升到高中時鑽研大學數學課程。
■記者蕭洛汶