以性感女侍應做生招牌嘅美國快餐店Hooters，7月會喺中環蘭桂坊開分店。餐廳賣嘅漢堡包、三文治好唔好食當然好重要，但大家更關注嘅可能係一班背心短褲玲瓏浮凸嘅女侍應啦！早前有網民話，Hooters fb上一班Hootersgirls係違反商品說明條例，話佢哋身材唔夠好，樣貌唔夠標致喎！
八方噚日經過中環雲咸街，性感女侍應又真係一個都見唔到，只係見到大大個招牌（圖）。原來餐廳仲裝修緊，有裝修工人話工程進行咗個幾月，預計幾日後起貨。餐廳有兩層，裝修以橙紅色為主，亦用咗木條做店內裝飾，都幾有活力㗎！
餐廳圍板仲話現正請餐廳經理、廚師等，相信Hooters唔使幾耐就可以開店啦！