最近香港零售市道麻麻，尤其係旅遊業都要諗盡辦法吸客。好似新地（016）旗下嘅天際100觀景台一直都係內地客遊港嘅熱門景點，最近就同Sanrio合作，去到8月中都有以Little Twin Stars做主題嘅裝飾。
天際100都好識做㗎，話說搭lift 60秒就上到100層，廣播簡介都係以普通話行先、之後先到英文同廣東話。天際100總經理黃慧儀就話，𠵱家訪客比例有三成內地客、四至五成係來自不同地方嘅海外旅客，剩番兩至三成先係香港人。
暑假係東南亞國家旅遊旺季，黃慧儀就話，其實𠵱家都有唔少來自新興國家，好似印度、泰國嘅遊客，近來韓國、日本客增長就最明顯，今年靠Little Twin Stars暑期推廣，目標人流可以升多一成。