前星期遇到一位海外升學輔導顧問，來自跨國集團，專門輔導內地和香港學生往外國升讀中小學寄宿學校和大學，地域當然以歐美加為主。
原來呢位顧問雖然來者不拒，生意第一，但如果家長要佢俾意見，佢就建議起碼在香港讀完中三先至出洋，因為咁樣就會有番一個起碼嘅中文根底，他日學成歸來，還可以有基礎再深造中文，改善程度；年紀細細就去讀寄宿學校又點？佢答：「包保對中文失去興趣，大個之後唔識中文，搵食非常蝕底。」
去英國讀幾年，考GCSE攞上佳成績，返來香港讀大學又有冇好處呢？顧問答：「以前一啲都冇，GCSE考十科A，香港三大（中大港大科大）當你考到十科C㗎咋，但英國就快會改評分制度，有A**、A*等，要再評比過。香港本土學生係考試機器，在外國考試威啫，返到嚟都係普通料。」
然後睇到2016年度IB放榜，香港去年有27人係滿分（45分）狀元，今年得18個，看似退步咗喎，其實已經超越世界標準好多。睇吓啲數字，全球有149,451個IB考生，狀元有147個，即0.1%，香港有考生2076人，出咗18個狀元，比率係接近0.9%，零零舍舍超越世界啫，而且香港考生及格率高達96.8%，全球及格率係79.5%，領先好多，香港當然係叻學校先至有IB課程讀，而且非英童國際學校只准校內叻學生讀，本港IB考生直情係精英中之精英。
加拿大國際學校有兩位女生考獲滿分，皆獲港大中大醫學院率先取錄，一位亦同時得MIT及約翰霍普金斯取錄。左丁山老友賓架R係加拿大國際學校創辦人之一，佢對CIS近年考試成績標青，十分開心，引以為榮，今次特登對左丁山講：「哎吔，MIT與Johns Hopkins咁好嘅大學，狀元應該去啦。JH更係醫學聖地，出名過港大中大好多噃！」左丁山笑佢：「你唔通係堅離地？即使Johns Hopkins醫學院聲譽響噹噹，IB狀元去到要多讀幾年第一學位，畢業後又唔可以返嚟行醫，做不成香港醫生，點好呀。」賓架R先至醒起，香港醫學組織對外地醫學畢業生有排斥主義，拼命維護本地醫生利益，梁家騮在立法會好似玩馬騮戲，令旁觀者頹喪，香港市民嬲爆咪又係咁！一位醫學教授同左丁山講過，因行醫資格問題香港學生好唔願意去英美讀醫，漸漸缺乏國際視野，失去世界醫學最新觸覺。長遠嚟講，會將香港醫療水平拉下馬！