日本係香港人熱門嘅旅遊地點，咁啲球星放假又會去邊度呢？之唔係位處地中海嘅西班牙小島伊比薩囉。幾乎係球星都嚟玩，家陣美斯喺度，連啱啱幫葡萄牙捧咗歐國盃嘅基斯坦奴朗拿度（C朗）都喺度。正所謂相請不如偶遇，既然大家都喺伊比薩島，唔知C朗會唔會約埋美斯一齊曬太陽呢？
伊比薩島似乎成為咗球星度假勝地，前西班牙國腳中場沙比阿朗素之前就同蘇爾達杜等同鄉嚟呢度玩水同曬太陽。除咗西班牙球員識玩，英格蘭球員都有嚟；三獅兵團喺今夏歐國盃16強出局後，陣中球星包括朗尼、哈利卡尼同迪利阿里即刻飛過嚟鬆一鬆。伊比薩咁好玩，C朗梗係唔執輸都嚟玩埋一份，呢位31歲皇馬球星周一出席完葡萄牙嘅勝利巡遊同慶祝活動後，暑假亦正式開始，仲喺周三俾狗仔隊影到同屋企人，包括媽媽同五歲嘅小C朗坐遊艇出海。
廿四孝C朗幫阿媽沖身
雖然C朗都有落水玩，但畢竟喺周日歐國盃決賽整傷左膝韌帶，所以大部份時間都喺架遊艇度享受日光浴；就算度緊假，C朗一樣咁照顧家人，主動幫玩完水上番艇嘅媽媽同囝囝沖身，真係孝順仔兼好老竇。話時話，C朗「天敵」、早排宣佈退出阿根廷國家隊嘅巴塞球星美斯都喺伊比薩度假，同女友安東莉娜加埋囝囝享受家庭樂。若然美斯同C朗喺伊比薩撞到，唔知會唔會約埋曬太陽同傾吓湊仔經呢？
膝傷未癒求助胎盤神醫
講開C朗，有指佢準備搵塞爾維亞女神醫馬莉安娜（Marijana Kovacevic）幫手醫腳。家陣住喺杜拜嘅馬莉安娜，之前用馬胎盤極速醫好多名球星，包括曼城後衞高柏尼、費倫巴治前鋒尹佩斯同車仔後衞伊雲洛域等，所以C朗搵佢幫手都啱數㗎；暫時都未知C朗實際要唞幾耐，但最少都一個月，最長更有可能係五個月。另外，自2013年起雄霸《福布斯》體壇球隊價值榜嘅皇馬，喺最新一期排名以36.5億美元跌落第二位，屈居喺值40億美元嘅NFL球隊達拉斯牛仔之後。
出發追星？盛惠一萬
位於地中海嘅伊比薩，係鄰近西班牙沿岸城市華倫西亞嘅小島，只有571平方公里。呢度水清沙幼風景怡人，又有唔少夜店，所以吸引唔少球星嚟叉電。香港冇直航機去伊比薩，要喺馬德里或法蘭克福轉機，最少要坐十幾廿粒鐘飛機先到，經濟位機票大約港幣一萬蚊。
