1976年11月創刊嘅《選擇》月刊，噚日正式推出40周年fb專頁，搜羅有影響力嘅調查，例如創刊號專題報道食油檢測、86年有奶嘴含致癌物、87年發現「穿窿」避孕套、06年專題介紹PAAG隆胸等。從40年檢測嘅產品都可以睇到消費文化變遷，例如由上世紀80年代測試傳呼機服務質素，到90年代「大哥大」，以至近年智能手機等。fb專頁仲會每星期上載最新資訊㗎（ http://facebook.com/hongkongchoice ）。
另外，消委會仲會出一本書《健康手札》，專講消費智慧、冷知識，釐清坊間常見謬誤等，包括護膚貼士、食飯同飲果汁、牛奶嘅健康之道，點樣為子女揀選安全嘅牙膏、沐浴露、洗髮露等。《健康手札》11月出版，下周書展開始預訂。《選擇》月刊40周年又會送雙人木碗畀預訂兩年嘅讀者。