「每日早餐前粉碎一個自己偏愛的假說，是科學家不錯的早晨運動──這樣他可青春常駐。」──奧地利動物學家洛倫茲
周末下午在尖沙咀，本打算和Q食Tea，結果吃了個便宜的全日早餐，五十蚊有找，且味道不錯。Q邊咬着牛角包，邊跟我探索全日早餐的奧義。
Q：「明明食緊下午茶，點解叫早餐？黎明話唔會空肚食早餐，莫非指全日早餐？」
我：「係翻譯問題。中文講『全日』，自然唔應該叫『早餐』，但英文All-day breakfast就無矛盾。Breakfast照字面解，即『打破禁食』。古英文本來用另一個字講早餐，後來模仿中古法文desjuner，就造咗breakfast呢個字。英、法文早餐嘅字源，都係拉丁文disjejunare，字面解『停止禁食』，所以拉丁文、法文、英文講早餐嘅字，從字源分析，統統冇話係朝早，只要係第一餐都可以用。All-day breakfast呢個詞，聽講係上世紀五十年代先有人用，或者呢種餐係由嗰陣開始。」
Q：「話時話，全日早餐同茶記早餐A有乜分別呢？大家明明都係炒蛋、腸仔、煙肉、多士，只要將A餐嗰碗肉丁麵或炸菜米拎走，換做薯餅、茄汁豆、蘑菇、番茄，價錢就係茶記早餐嘅四、五倍，唔通因為全日早餐係常規以外嘅嘢，所以特別貴？」
我：「其實All-day breakfast同劉鳴煒一樣，都係勝在個Package。例如麥記早晨全餐，賣近三十蚊，但只要你移除嗰塊薯餅、嘢飲、牛油同果占，冇錯，就係一個豬柳蛋漢堡嘞。豬柳蛋漢堡十一點後賣十蚊，但十一點前分拆上市，叫價就高好多。又例如鐵板神數，其實只係紫微斗數加四柱推命，但佢一開始搞場大龍鳳套你六親生肖，再用啲模稜兩可嘅詩去present個結果，即刻收貴十倍。拆開睇，All-day breakfast的確同茶記早餐A冇咩分別，早餐A多碗麵，分分鐘飽肚過佢，但阿里士多德講過，『整體大於部分嘅總和』，所以你話Package呢樣嘢係幾咁重要，亦幾咁玄妙。你睇得穿全日早餐，就睇得穿人生。」