特首梁振英早前接受訪問，出口術批評領展（前稱領匯）不能簡單說是商業機構、要向股東交代就不顧公屋居民需要，結果反遭領展「將軍」，表明歡迎政府回購，梁急補鑊否認回購。有政界中人稱梁根本沒辦法解決問題，重提領展不過「呃吓民望」，因為早在特首選舉時梁已「拍心口」處理，但4年下來沒下文。
該政界人士笑言，2012年他有份幫何俊仁搞特首選舉，還記得梁出席一場在屯門友愛廣場的政綱諮詢會，當時有居民投訴領匯加租逼走小商戶，梁提出可在公屋範圍額外興建租金較平的商場，為居民提供其他選擇，「但梁當選後4年來乜都冇做過，呃咗班街坊，𠵱家喺櫃桶底又拎翻領展出嚟打，想呃班公屋居民第二次」。
曾承諾另建商場
有地區人士亦指，不論梁還是林鄭提出，在領展商場附近另起購物點，以免領展壟斷，「講就易，做就難、甚至近乎冇可能」，因為香港大部份屋邨已有規劃，基本上沒有空地可建街市或商場，「一係就用邨內球場或公共空間起，但塊地未必夠大、居民亦會反對」，且亦未必符合消防等法例要求。若在邨外興建，「一係要行好遠，街坊特別長者點可能行咁遠？就算有塊又近又大嘅地，呢幾年一早畀梁振英拎咗去起樓」，故簡單而言，梁、林鄭所謂解決領展「根本得把口出口術」。
有商界中人警告，領展是上市公司，只要做生意方式合法，縱使政府不滿，也不能打壓，「如果政府因政治理由，用政府力量打擊一間上市公司，咁香港國際金融中心地位就會毀於一旦，仲有大企業敢嚟香港投資？」
季陶
周一、三、五刊出