立法會換屆選舉將至，預料建制派統統要面對一個問題，就係支唔支持CY連任。將卸任嘅議員林大輝認真細心，叫CY畀model answer建制派參考，但CY當然提供唔到啦，反而向來鬼馬嘅立法會主席曾鈺成有妙計，拋出一個答案，話建制派候選人一定攞到like喎！
話說答問大會之後，記者去追訪曾鈺成。對於「標準答案」，曾鈺成一貫笑騎騎話：「我話（如果）想攞晒分，就話『我支持曾鈺成』，咁實攞分啦！啱唔啱先？」嗱嗱嗱，曾鈺成近期已經N次講到好似自己會去選特首咁㗎嘞，無論係咪真去馬，呢種虛張聲勢肯肯定嚇到一啲有心人。
咁另一黑馬、財政司司長曾俊華，又點睇答問大會上CY被好多議員要求落台？民望咁高嘅佢，又會唔會選特首呢？鬍鬚曾聽完問題，回頭向記者微笑一下，但冇回應係咪參選，似乎想記者喺佢微笑中，領略心聲。
咁有冇聽過外傳曾鈺成會同佢組成「雙曾配」、協助佢選特首呢？鬍鬚曾繼續唔正面回應，但強調自己同曾鈺成「好熟，梗係熟」；想唔想曾鈺成助選？佢話唔係，然後「哈哈哈」就走人。如果問佢係咪會協助CY參選，唔知反應又係點？