麥兜同麥嘜，應該點樣分？唔使問工聯會王國興，因為佢係亂咁嚟。
立法會臨尾都陷拉布戰，MC興點都要出動佢嘅招牌金鉸剪攞尾彩，但噚日佢仲擺埋麥嘜上枱，之但係麥嘜身上嘅名牌，卻寫住「麥兜」喎。吓，麥兜塊面係有撻啡色嘅圈圈㗎喎，仲乜夾硬張冠李戴屈麥嘜？
八方好奇，MC興嘅發言同麥嘜有乜關係？聽咗大約十分鐘，終於有少少頭緒。佢話喎，今次剪布，要靠企喺市民利益嘅議員齊心先事成，正如隻畢業嘅麥嘜公仔咁吖，有麥兜秘笈（係呀，佢發言時，大包圍麥嘜同麥兜都講勻），而個秘笈就係：「得正正喺度，坐定定喺度，乜都唔使做，就可以對抗點人數剪布。」之但係呢，「得正正喺度」呢句說話，係校長而唔係麥兜講㗎喎，相信麥兜嘅粉絲真係想「握悶田田問後您」。