巨星梅艷芳雖然離世已13年，但梅媽覃美金和哥哥梅啟明為了她的遺產，多年來跟匯豐信託打官司，兩母子因訟費被判破產後，梅媽呻每月3萬元生活費捱得好辛苦，梅啟明就被讀者陳先生「爆相爆片」捕獲，大前晚在銅鑼灣的海鮮燒烤餐廳，豪嘆鮑魚和白酒。
話好彩中獎
大前晚約8時許，梅啟明單拖在餐廳開懷大嚼，跟侍應有傾有講似乎是熟客，讀者陳先生在電話說：「佢好似成日嚟咁，見到佢叫咗兩隻鮑魚，一隻都要百幾蚊㗎，再叫咗魷魚、西班牙火腿，仲飲咗最少三杯白酒，埋單都要成600幾蚊。」
前晚記者致電梅啟明了解，為何破產都有錢豪食鮑魚？他扮儍說：「海鮮餐廳？係咩？食兩隻鮑魚咁犀利，一隻啫嘛。」記者指餐廳消費好貴，梅啟明說：「抽到獎嘛，餐廳一周年，之前行過飲杯嘢，放張紙抽獎又抽到，咁咪食埋囉，又有啲禮物，紅酒、白酒呀咁，我畀咗百幾蚊，coupon有500蚊，好彩之嘛。」
失業吸空氣
問梅啟明破產令何時完結？他說：「差唔多啦，眨吓眼4年，今年到期會通知。」現在有否工作？他賴皮說：「我做你跟班啦，唉！你睇我幾鬼多人憎先得㗎，邊度有人請。」要否借錢度日？他大呻：「問人借都冇人敢借啦，明知我破咗產。」是否要梅媽照顧？他否認：「我唔使佢照顧。」問到冇工作怎生活？他說：「吸空氣囉！」
另記者向大律師林作了解，他表示破產人原則上可維持一定生活質素，除非當事人在法庭頒破產令後刻意隱瞞、存有欺詐成份收起資產，花費在搭的士或豪飲豪食上，才惹犯法之嫌。而本報向梅啟明光顧的餐廳查詢，獲回覆日前的確舉行周年抽獎，但問到coupon的內容，接電話的員工表示不清楚。
採訪：皓騫