日久見人心，近年陸續有梁粉變心。導演張堅庭係第一批倒戈梁粉，曾為CY站台嘅佢好早已經話後悔，最近喺商台節目《雲常開》稱：「（社會）咁矛盾咁撕裂，我都要道歉。」仲讚唐唐人品好，點解呢？
阿庭話當年獲唐唐邀請訓練口才，佢話明撐梁但唐唐唔介意，因此對唐唐有好感。唐唐敗選後仲送咗一箱酒畀佢，每支過萬蚊，佢覺得對方好可愛，亦令佢發現港人唔需要深不可測嘅政治領袖，有時蠢同儍一啲都冇問題。
問及CY吸引之處，張堅庭話冇，話當初支持佢只係想有人競爭，而CY主打幫弱者而加分，後嚟卻爆出誠信問題，令佢非常後悔。佢自爆曾撰文撐CY，《富二代與蠱惑仔》嘅文章題目卻被CY擅改成《富二代與醒目仔》，佢曾向CY競選團隊反映但未獲理會。