即將離開立法會嘅白鴿黨「鐵頭仁」何俊仁，臨別秋波送大禮，將一批年輕照曝光益街坊。八方發現，仁哥細細個已經打呔兼着皮褸，𠵱家被人笑似《老夫子》大番薯嘅佢，竟然係型仔飛一名，外形變化相當大，莫非係早年遇襲時唔覺意中埋「面目全非腿」？而佢仲自揭少年時好揪得，成日同人打交！
1951年出世嘅仁哥，有六兄妹，佢排第二，妹妹最細。仁哥憶述細個時，每隔幾年都會影全家福。而佢細細個嘅打扮，似乎比𠵱家只着西裝更有心思。有張佢同現已移居加拿大嘅三弟合照，就見佢着皮褸兼打呔，成個型爆死飛仔咁樣。
「打交都係着皮褸」
仁哥記得張相係攝於細個住嘅北角渣華道，自爆當年「打交都係着呢啲皮褸」，自言細細個已經好百厭，仲好似𠵱家玩極限遊戲啲人咁，喺打通嘅大廈天台跳嚟跳去，又成日同其他細路互相整蠱，當年嘅升降機仲要人手開關門，佢哋咁都可以玩一餐，「人哋搞我我又搞人，啲人想出嚟我就推住（道門）唔畀佢出，佢想走我就拉住（道門），唔畀佢走，哈哈。」
呢批舊相中，驚覺仁哥嘅眼袋原來由來已久，仁哥搞笑話：「我諗係影相先影到嘅，我唔知喎，我咁嘅樣，冇乜照鏡！」
李八方
mailto:[email protected]