星星地產(1560)未正式招股嗰陣,就因為大股東自願延長禁售期而大出風頭;噚日終於掛牌,大股東兼主席陳文輝(人稱Joe哥)開心之餘又鬆一口氣。
撞正五間公司同日上市,五位老闆當中,Joe哥set行個頭出席上市儀式,自然最搶鏡喇。不過話時話,大家覺唔覺得Joe哥熟口熟面,跟鴻福堂(1446)執行董事司徒永富有幾分相似呢?
57歲嘅Joe哥喺金融界頗有江湖地位,佢1995年已經係摩根士丹利亞洲董事總經理,1998年自立門戶創辦嘉理資產管理(Galaxy Asset Management),專門發掘有爆升潛力嘅細價股。
雖然星星地產噚日平收,冇乜火花,但市場人士都望實呢隻股。