【本報訊】被視作為港爭光「秘密武器」的付遠威，於2014年代表香港、出戰仁川亞殘運帆船比賽，果然一鳴驚人，為香港摘下首面銅牌，贏盡掌聲，惟有誰知道，這名開朗愛笑、自強不息的再生勇士，家庭、運動兩得意，原來亦曾歷盡黑暗，幸而在生死一刻的瞬間，令他醒覺失意並非絕路，悟出「第二生命」走入運動界，追尋下一個奧運夢。
記者：龔蕙芝 攝影：張軍、阮斌
「如果喺樓上望落去，好想就跳落去，都唔明點解會咁，感覺個諗法係好自然。」3歲小兒麻痺症病發、以致雙足殘缺的付遠威，最難以忘記的傷痛始於7歲時遭別人嘲笑，「你跛嘅，唔正常呀，唔同你玩」，孩子們沒頭沒腦的戲言，卻將阿威打落谷底：「唔開心但講唔出口，覺得自己係男仔一定要忍。」
負面情緒幾乎完全控制了阿威，夜裏總躲於被內啜泣，變得自卑又不苟言笑。直至17歲，坐在木凳上的他從20多級樓梯滾下來，「我仲清楚記得，聽到木凳逐級滾落，清脆嘅斷裂聲。嗰刻諗，如果我好似張凳咁散晒，就一了百了」。
在生死一刻，阿威想起摰親：「如果了結咗，咁屋企人點算？」思想就如燈泡一亮，驅走黑暗，「呢件事畀到我『第二生命』，我同自己承諾，用3年時間去自立」。結果往後數年，他學習家電維修，從專業裏建立自信，隨後結識現任太太，95年結婚，育有3名子女，一家五口快樂生活。以為平凡是福，誰知，運動讓他的人生命走上另一高峰。
07年一次街上偶遇認識了一名傷殘人士，得知傷殘人士可以開車，更可以玩運動，還一口氣報了射擊、籃球及劍擊三個試玩班，「籃球學咗半年，劍擊玩咗一年，最後覺得射擊比較有興趣」。一年多後，即被召入射擊特訓隊，每星期練足5晚，每次2小時，卻要花上8小時準備，來回何文田的家至大圍的靶場，等巴士也花上3小時，但並沒打擊他的意志，終在09亞洲射擊錦標賽奪得第四名。
其後在一次廣州亞殘運時，認識一名划艇運動員，建議他轉玩帆船，令他大感疑惑：「我都覺得有冇可能㗎？特別我哋坐輪椅嘅，唔好話玩帆船啦，出海嘅機會都唔高啦！」第一次上船更被嚇得抖震，但出海後讓愛上了在海中的寧靜和自由，2013年後隨隊訓練10個月，沒想過首次代表香港出賽即勇奪銅牌。現時他全身投身帆船運動，每周三天練習，平日又會以走斜坡、引體上升來鍛鍊手力和體能。
由絕望找到希望，現年43歲的付遠威希望以身教來影響三名子女，「心態正面係最重要，可以貢獻社會，令身邊人開心。」他又以帆船終點比喻人生，認為人必須有目標，「要知道自己想點，先會識得點行，跨越困難就會見到藍天，千祈唔好放棄追逐自己嘅夢想」！未來，他希望能代表香港參加殘奧帆船項目，才不負爺爺為他取名「遠威」的期望，做到「遠」近馳名，建立「威」望。