羅渣士喺歐聯輸畀紅魔鬼？聽落冇乜特別，輸畀曼聯箒。唔係喎，曼聯今季邊有歐聯踢？睇真啲，羅渣士真係個面皮七呎厚嘅「足球天才」，佢帶領蘇超班霸些路迪喺周二歐聯外圍賽第二圈首回合，作客0:1輸畀直布羅陀嘅林肯紅魔鬼！不過，羅帥賽後話唔覺尷尬喎，可能佢都瘀慣啩。
歐聯外先輸一粒唔尷尬
原本牌面強弱懸殊，點知羅渣士帶領嘅些路迪唔單止攻唔入，仲喺48分鐘俾對手正職做警察嘅L卡斯加路射入，最後輸0:1。話就話有次回合，但堂堂些路迪竟然輸畀隊半職業隊，真係咪話唔肉酸。前些路迪射手、家陣喺《天空體育》做緊講波佬嘅安迪獲加話睇到眼都凸，認為呢場係些路迪史上最恥辱嘅敗仗。不過，人無恥則無敵，羅渣士賽後話：「我冇感到尷尬，係失望箒。場波好難踢，我哋把握唔到機會，但對手把握得到。」我求大俠睇番數據，羅渣士教過五隊波，除咗教利物浦喺處子戰贏波，其餘四次領軍首戰都係贏唔到。
1.06倍客W中伏慘慘豬
紅魔鬼主場坐5,000人，成個直布羅陀人口三萬幾人，些路迪主場已經容納到六萬人嘞；羅渣士，你尷唔尷尬？紅魔鬼今場一半正選都係兼職（見附表），有公務員、海關同警察，些路迪就全部都係職業球員；羅渣士，你慚唔慚愧？賽前足智彩嘅些路迪客W賠率熱到1.06倍，紅魔鬼主W就冷到20倍；羅渣士，你對唔對得住重注「客其他」，由九倍買到落六倍嘅捧場客？最緊要輸完竟然話唔尷尬；羅渣士，你會唔會面紅㗎？
羅渣士抵鬧，紅魔鬼就抵讚，佢哋今場踢5-4-1嘅效果好好，製造四次中目標埋門，只係少些路迪一次，仲要入到波。呢隊直布羅陀班霸近三年都有踢歐聯外，但只係半職業球隊；做警察嘅入球功臣L卡斯加路話：「發夢都估唔到可以贏到些路迪咁嘅大球會，我哋竟然喺直布羅陀呢度做到！射入呢球應該夠我講成世！」直布羅陀政府仲發新聞稿，恭賀紅魔鬼創造奇蹟。