拜恩（Kobe Bryant）退休之後有乜做？各位粉絲唔好以為呢位37歲嘅前湖人球星唔打波就好得閒，因為佢周二喺社交網站宣佈老婆雲妮莎又有咗，佢哋將會迎接第三位千金，睇怕拜恩遲吓都要忙住湊女喇！
經過20年嘅五冠NBA生涯之後，拜恩曾經講過話想用多啲時間陪吓老婆雲妮莎、兩個囡囡妮坦莉亞（Natalia）同珍娜（Gianna）。估唔到拜恩真係好努力咁陪家人，仲好努力咁「造人」㖭，周二喺instagram上載咗張相，相入面係印住「Baby Mamba」嘅衫仔同一對Kobe 11波鞋仔，向粉絲報喜：「好開心咁同大家宣佈，我哋將會迎接第三個囡囡！」
小曼巴運動基因勁
假如大家係「黑曼巴」嘅死忠，就一定知道佢除咗打籃球勁之外，踢波亦唔差。佢嘅囡囡都遺傳到呢啲運動基因，13歲嘅妮坦莉亞就對足球充滿熱誠，當佢參加比賽嗰陣，拜恩兩公婆不時都會到場支持佢㗎；至於10歲嘅珍娜就繼承到老竇啲籃球天賦，細細個就識射波，最搞笑係拜恩問佢點解識呢啲動作嗰陣，珍娜就話：「我梗係睇你啲比賽學番嚟啦！」唔知遲啲「小小小曼巴」出世之後，會好似大家姐咁踢波，定係跟二家姐打籃球呢？
放眼聯盟，仲有邊個好似拜恩一樣咁有外父相？原來前NBA球星比立斯（Chauncey Billups）、「戰神」艾華遜（Allen Iverson）同效力緊熱火嘅保殊（Chris Bosh），全部都有三個囡囡。至於老將皮雅斯（Paul Pierce）同勇士嘅「咖喱仔」史堤芬居里（Stephen Curry）都有兩個女；當中「咖喱仔」嘅大女拉莉更加係球壇風頭躉，唔少粉絲都覺得佢賣萌個樣勁得意。
住家男人俾老婆寸
不過，大家咪以為拜恩任何時候都可以好似喺籃球場上咁無所不能，當佢要喺屋企服待老婆嘅時候，都會顯出無助嘅一面！美國《TMZ》周二上載咗段短片，影到有隻蜂鳥飛咗入拜恩屋企，雲妮莎同兩個囡囡就不斷指揮拜恩趕走隻雀，但佢出到掃把都趕唔走隻雀，雲妮莎就好唔畀面即刻話：「你係咪玩嘢呀？快啲拎個網捉走隻雀啦！」