民主黨主席劉慧卿都有甩轆時，噚日佢又唔見咗銀包嘞，係咪好大頭蝦呢？是咁的，卿姐昨早喺中環坐的士到立法會，落車後發現唔見咗銀包，於是打鑼搵人幫手；除咗黨友同泛民，打埋電話去電台節目《馬路的事》尋包。
過咗冇耐，銀包自動返去佢手。原來嗰位的士司機載完卿姐之後到灣仔君悅等客，發現有個銀包喺後座，一睇之下發現屬於卿姐嘅，於是完璧歸趙。卿姐見呢位司機咁好心，諗住薄酬一下，但司機斷言拒絕，惟有公開向司機講thank you！
查實呢次係卿姐第3次唔見銀包，佢都算好彩，除咗第一次搵唔番，上次同今次都失而復得。佢噚日仲剛提款7,000蚊，連同信用卡、身份證同八達通，萬一搵唔番，唔只肉赤，淨係搞報失、補領都有排煩。