一向鍾情美食車、仲曾因此組團到美國考察嘅自由黨飲食界議員張宇人，噚日趁今屆立法會收爐在即，身體力行喺走廊推出一架裝滿過百個蛋撻嘅「美食車」，請一眾傳媒行家食撻。
但最令全場記者笑得開心嘅，並唔係佢嘅蛋撻，而係佢被問到怕唔怕體育、演藝、文化及出版界議員馬逢國（馬早前話唔鍾意記者喺走廊食嘢）見到會唔鍾意時，佢就神回一句：「馬逢國？邊個嚟㗎？」
張宇人話呀，酥皮蛋撻係佢至愛，但由於知道部份記者覺得酥皮太肥膩，所以特別準備咗另一款牛油皮蛋撻。
張仲即席係咁聞呢批新鮮出爐嘅蛋撻，然後好似味吉陽一上咗身咁話喎：「我覺得酥皮真係好香、好鍾意呀！」唔通做得飲食界議員，天生都對食好西特別陶醉？