閉起雙眼你最掛念誰？2012年開始現屆立法會會期，開埋最後一次大會、周五晚凌晨12點收爐，四年會期創造唔少經典場面，八方趁立會散檔前嚟個大盤點，花生指數真係多到數唔晒，元秋Tree根吳亮星，點分得清誰勉強娛樂過誰？笑中有淚情景亦唔少，由小明破天荒踩場到政改表決28比8，感激大樓裡，尚有議員能令大家滿足到落淚。或者大家9月5日一覺醒來，現屆70個議員，擁不擁有也會掛念誰。
1 》2012年10月中 蔣麗芸護航保儉變元秋
如果呢屆議會無咗喺九龍西勝出嘅民建聯蔣麗芸，可觀性肯定無咁好睇。蔣家千金走入議會，盡顯大小姐本色，啱啱履新無耐就發威，喺討論叫吳得掂下台議案時聲嘶力竭護航：「唔推咪唔推（國教）囉，洗唔洗炒咗佢呀？」嗰股霸氣令人諗起《功夫》入面嘅包租婆角色，從此被封民建聯元秋，以獅吼功打響名堂。
2》2013年7月中 西環小明首訪立會想破冰
中聯辦2012年立會選舉後換班，嚟自港澳辦現年53歲嘅張曉明替代彭清華成最年輕主任，梗係想有一番作為，所以翌年破天荒到立法會同議員午宴仲發表政改「筲箕論」，但泛民向佢交請願信促真普選，佢只叫助手代收。到底係咪破冰？從人大8.31落閘，大家都睇得見呢場可破冰午宴騷，無非裝模作樣大龍鳳一場。
3》2013年11月 港視風波Tree根叫維基收皮
民記元秋喺議會之初就跑出，同樣語出驚人嘅黨友鍾樹根留前鬥後，一年後先露兩手（定口？）。佢喺2013年港視失落免費牌照風波時，喺一委員會討論時直指港視主席王維基身家少，高叫：「收皮啦！」而之後連串爆發嘅鍾式英文兼成語，反而令佢人氣急升，唔知再戰港島立法會，最終係佢定維基收皮呢？
4》2014年2月 何俊仁開會iPad睇艷女照
又係嘅，有時全日坐定定開會真係幾悶㗎，唔少人會偷偷上FB或者睇新聞打發時間，但民主黨何俊仁就揀咗睇艷女照解悶。2014年財爺宣讀預算案期間，何俊仁被影到以iPad睇艷女照片，旋即被網民封為AV仁，艷聞較當日預算案更受關注。何俊仁即日say sorry，承認開會期間唔應該睇其他嘢，應專心一致嘅。
5》2014年6月 吳亮星混亂中通過東北撥款
立法會近年淪為馬戲團，連表決撥款都兒嬉亂咁嚟，好似東北撥款呢個大project，梗係要詳細辯論，點知當時做財委會主席嘅吳亮星，喺2014年6月中審議撥款時，無視泛民議員離席抗議，突然宣佈表決粗暴通過，睇到市民啞口無言，會後速逃避傳媒，處理手法連建制派都覺得唔掂，最後唔再畀佢掌財委會咯。
6》2014年7月 毓民掟杯案 玻璃碎片矚目
今屆議會，唔少抗議場面相信大家歷歷在目，長毛嘅鳥籠、王國興嘅天殘腳之外，黃毓民涉喺2014年7月特首答問大會上向梁振英掟玻璃杯，嗰一片玻璃碎，相信大家印象難忘。毓民其後被控普通襲擊罪，8月續審。唔知新一屆嘅議會，仲有冇咁嘅場面？
7》2014年11月 無厘頭衝擊立會爆玻璃
抗爭呢家嘢，就算無底線，都應該要知道目的係乜啩？但呢屆議會其中一幕花生事，就源自一班蒙面示威者，話會議即將審議俗稱「網絡23條」嘅《版權條例》喎，11月19日晚咪衝入立法會，令大樓史無前例爆玻璃。諷刺嘅係，根本條例唔喺當時議程，而有啲人衝完又想走人；搞笑嘅事，核心議會外圍同樣精彩。
8》2015年6月 建制等埋發叔 政改甩轆收場
嚴選本屆最難忘一幕，無可能唔係政改表改甩轆收場。泛民拒絕袋住先，本來如期投票就令政改大龍鳳否決收場，隨之上演嘅係批評泛民係普選罪人嘅建制大騷，點知，因為劉皇發因病未趕到，因為建制派無隊型，因為吹雞離場者未夠班，意外令政改方案以28票比8票否決，留席嫻姐嘅O嘴樣，相信大家記憶猶新。
9》2015年9月 退黨湯家驊淚別立法會
政改立場同抗爭態度，令公民黨創黨成員之一嘅資深大狀湯家驊黯然退黨，仲提早喺任期完結前一年辭職。向為性情中人嘅湯狀，2015年6月講述會跟黨投票反對政改時，哽咽離開，幾日後宣佈退黨兼辭職，自歎留喺議會冇作為，另創民主思路續推政改。而佢辭任後舉行嘅新東補選，由前愛徒楊岳橋勝出。
10》2016年7月 梁家騮狂拉布玩謝左中右
幾乎次次流會都有份，無一次在席開會嘅醫學界梁家騮，唔通覺得卸任前應該有啲表現，唔想辜負怪醫之名，所以喺最後會期狂拉布，以求拉倒佢反對嘅醫生註冊條例？嗱，由政務司司長林鄭月娥到立法會主席曾鈺成，以至建制甚至泛民都話佢拉布拉得太癲，證明佢臨尾為議會帶嚟無限驚喜，可算極具特色告別戰。