NBA球星杜蘭特（Kevin Durant）一連三日嘅大中華之行香港站，噚日第二日大會就冇安排公開活動，又冇透露KD嘅行程。不過，都有喺街上面眼利嘅市民同留守酒店嘅球迷，捕捉到KD真身，仲同佢合照、攞簽名，認真好彩。今日KD就會喺銅鑼灣出席香港站最後一個公開活動，仲未捉到KD嘅球迷，就要把握機會喇！
KD前日傍晚攰到爆咁由廣州嚟香港，去到修頓出席活動嘅時候，雖然間唔中會打喊路，但都好識搞氣氛，對球迷有求必應。
行赤柱、銅鑼灣被「捕獲」
噚日佢一早就喺酒店出發，先係疑似「手痕」去咗修頓練波，之後仲走入鬧市，雖然好低調，但都被市民分別喺銅鑼灣一間服裝店同埋赤柱「捕獲」，仲將佢哋嘅合照放咗上社交網絡㖭。
「濕平」完嘅KD大約喺晏晝三點幾就返到酒店，現場都有七至八名球迷一窩蜂咁圍住佢攞簽名，而一向親民嘅KD都好友善咁逐一簽，不過就俾保安阻止同球迷合照。攞到KD簽名嘅17歲中學生就話好開心同興奮，覺得佢好有大將之風，所以勁鍾意佢喎。未捉到KD嘅你唔好灰心，今朝11點佢會喺銅鑼灣Tower 535出席最後一個活動，早啲起身霸位喇！
杜蘭特今日行程
11:00am 「852 X KD」展覽會
地點：銅鑼灣謝斐道535號Tower 535