打工仔要留意番，今時今日搵工，唔好以為整靚份CV就可以瞞到老細，原來班老細除咗會查求職者facebook，仲會查埋佢哋嘅信貸評級，實行由內到外摸清應徵者係乜人，先至落決定。
「環聯資料庫」會儲存消費者信用卡、貸款等信貸紀錄，然後每人都會得到一個評級，A級係最好，最差去到J級，呢個就係傳說中嘅「TU Grade」。
唔講唔知，TU Grade唔只影響銀行借唔借錢、批唔批卡畀你，環聯個人客戶業務總監羅瑞提到，擔任敏感職位嘅員工，好似銀行、保險、護衛公司等，誠信最重要，所以呢類行業嘅老細請人嗰陣，唔少都會問環聯攞應徵者嘅信貸報告，換言之，TU Grade差嘅話，可能影響到你搵工。
要TU Grade靚，好簡單，咪就係準時交卡數、唔好碌爆卡囉。