【本報訊】California Fitness母公司旗下共12間店舖突全線停業，不少員工是臨時收到通知，昨凌晨匆匆返回分店收拾細軟。有資深員工指心情難過想喊，亦有健身教練狠批公司「唔應該呃我哋」，更擔心市場飽和而失業，感前路茫茫。
女經理：唔捨得想喊
昨凌晨1時許，California Fitness、mYoga以及Leap共12間店先後貼出全線停業通告，有職員及教練陸續回到各店執拾個人物品。在銅鑼灣分店，已任職6年的姓陳女經理對公司停業感愕然，她透露前晚深夜11時半才收到公司有關停業通知，並立即趕回分店。「想喊，好唔捨得」。她表示「公司𠵱家仲拖欠緊6月份人工，今個月都冇得出」。而在屯門中心分店，10多名職員及教練在店內拍大合照留念，之後陸續帶同物品離開。
有員工向《蘋果》透露，原本同事對公司仍抱一絲希望，但前日下午公司財務部門同事已通知，指「老闆已經唔肯畀錢出嚟」，直至前晚再接獲全線停業通知，大家都感到徬徨。
任職健身教練逾6年的李先生希望追回遭拖欠的6月份薪金，約4萬元。他對公司停業感無奈，他說：「前一晚仲諗緊去跑數……噚日（前日）都有返工，點知夜晚就要衝返公司執嘢。」他批評：「（公司）唔應該呃我哋」，又指突然停業是不負責任，又擔心目前逾百健身教練再投入市場，自己或需轉行另謀出路。
■記者翁鈺輝、文雪萍