新一季港超聯近排俾「反富」搶咗唔少風頭，但各隊已經為下個月26號開鑼嘅港超聯展開備戰，而傑志噚日就開季前記招宣佈人腳、班費同目標，我求大俠亦有聽吓佢哋今季重點羅致、踢過德甲漢堡嘅林志堅有乜嘢講。同傑志簽兩年約嘅堅仔話，係咪長遠留港發展就未知，但好想踢香港隊喎，仲話首要適應香港炎熱天氣。
3,000萬班費又簽兩狂牛兵
25歲嘅林志堅噚日初次亮相，但睇佢似乎未試過俾十幾個傳媒「圍」，見佢有啲緊張，佢話近季經常受傷，希望返港發展可重拾踢波樂趣。呢位爸爸係香港人、媽媽係德國人嘅混血兵又話：「咁多年返過香港兩次，第一次係十歲，記得睇過場港隊賽事；第二次係舊年，去過傑志中心就好鍾意傑志，所以決定返嚟踢波，仲想幫港隊踢國際賽。」
林志堅喺11/12球季德甲爆出嚟，但上半季幫漢堡踢咗幾場德甲後冇影，之後幾季喺漢堡浮沉，踢預備組多過甲組，最後喺14年夏天以20萬歐元轉投德乙嘅格雷特霍夫，但係發展一般，其中喺上季季初因傷唞咗三個月，好番之後又被貶落預備組，成季只係踢過一場德乙。
上季只衞冕聯賽盃嘅傑志，今季好有決心爭取成績，噚日公佈今季班費成3,000萬港元，除咗有林志堅加盟，仲獲得前教練甘巴爾介紹嘅狂牛中堅保殊（Pau Bosch Hueso）同前鋒馬高斯（Jimenez Marcos）加盟，稍後再會簽個亞援。
有新外援加入，意味有舊援離隊，傑志同時公佈中場高文掛靴改任青訓教練，金泰敏同張國明已離隊，另外顏樂楓、安基斯、溫俊、梁家希、佐迪同列斯奧等要外借到友會。
前伊巴隊長終投東方
至於南華噚日就有塞爾維亞前鋒高馬斯（Nikola Komazec）隨隊試腳，足主張廣勇希望呢位高大前鋒幫到球隊，唔使再安排外援嚟試腳。另外，東方正式宣佈簽咗前伊巴隊長阿路巴連拿，呢位前鋒喺13/14年幫伊巴贏過西乙冠軍，上季就被外借至西乙侯爾斯卡，料子應該有番咁上下。