立法會議員葉劉淑儀講過：「好多年輕人當我係跑道。」原來「國際大鱷」索羅斯亦有呢個作用。據彭博引述消息人士報道，舊年仲幫緊索羅斯家族打理對外投資嘅Kieran Cavanna，已經自立門戶，上月成立一隻專攻股票同宏觀經濟趨勢嘅對沖基金。
消息人士透露，Cavanna上月與兩位拍檔成立Old Farm Partners，管理6,500萬美元（約5億港元）資產。
Cavanna係Old Farm首席投資經理，另外兩位拍檔Nishi Shah與Barry Purcell分別出任研究部主管同總裁。唔講唔知，Shah係索羅斯嘅前分析師，喺索羅斯家族基金打工九年。
Cavanna當年獲索羅斯前首席投資總監Scott Bessent聘任為索羅斯家族打理生意。Bessent舊年8月離開索羅斯家族基金，並自立門戶。而Cavanna與Shah亦喺舊年10月離開索羅斯家族基金。照咁睇，大鱷都幫過唔少人「起飛」。