家陣金融界關鍵詞肯定包括fintech，間間銀行都話搞，財爺曾俊華亦多次開腔力撐，仲話要將香港打造成金融科技中心，又成立20億元「創科創投基金」，畀fintech初創企業申請。有勢又有水，難怪fintech相關行業對於聘請員工亦比較積極。
人力資源顧問公司翰德今年4月進行調查，訪問咗604名企業僱主與員工，發現有近半受訪資訊科技公司打算下半年繼續請人，當中就包括fintech就業職位。
至於近月經常傳出凍薪、裁員嘅銀行同金融業，就只有25%公司話會增加員工數目。咁都啱嘅，科技係大勢所趨，唔少銀行分行都話行電子化，繼續調整人手都正路。
調查又發現，近九成受訪僱主覺得，自己公司非常鼓勵員工有創新思維，可惜，打工仔唔係咁諗，只得17%人覺得「腦細」有鼓勵佢哋諗多啲新idea，仲有兩成幾人覺得公司完全唔支持創新㖭呀。