早幾日美國十年期債息再創紀錄低位，換言之，美債價格再度破頂。但與此同時，美股同金價當時都一樣升緊，呢個局面令市場大驚同不解。
傳統上股市係風險資產，而債市就係避險資產，所以股市同債市應該呈反方向走，正常唔應該見到兩者一齊升。如果金價、股價同債價三樣嘢一齊上升，就更加違反常理，因為金價理論上只會同股市或債市其中一樣同升或同跌。好彩呢個「異象」周一已經消失，債價同金價已有少少回吐。
有分析將股市、債市同金市同時上揚嘅情況，解讀為市場憧憬放水，全線資產齊齊偷步炒上。另外，亦有指股債金齊升，係經濟情況正處於轉角嘅反映，意指有啲人睇到經濟惡化，於是乎買定美債同黃金避險，但另外亦有堆人堅持緊經濟情況仲OK而繼續買股，結果全部資產都有份反彈。
其實早喺2005至2006年間，MSCI AC世界指數、美國十年期債價，同埋金價呢三樣嘢，都曾經同時呈現上升趨勢。咁啱不久之後嘅2007年，美國就爆發咗次按危機，而次按危機又為2008年波及全球嘅金融海嘯埋下伏線。
好彩從月線圖睇，上述三樣資產今時今日走向仍然各異，即係話股債金齊升嘅「異象」尚未形成趨勢。但如果情況中期都仲持續住，咁就真係要留意吓背後原因，究竟純粹係市場憧憬放水，定還是已經係美國經濟由盛轉衰嘅預警。
話晒美國已經係全球經濟力度最強嘅主要經濟體，如果連佢都失守埋，環球經濟更PK之餘，聯儲局仲分分鐘要由講加息變成講減息，而減息預期一旦冒起，對不同資產嘅價格影響之廣唔可以睇少。
El.
http://fb.com/moneywalkerhk
本欄逢周三刊出