以古怪慢動作獨步全球嘅日本機械舞天團World Order，西裝骨骨咁由日本跳到紐約、倫敦、巴黎後，其中6個成員最近嚟埋香港拍片，一齊施盡看家本領，包括慢跑、人肉輸送帶、人體幸運輪，仲有經典嘅千手觀音等，拍攝地點仲與別不同：九龍城樂口福酒家嘅雕龍雕鳳、深水埗鴻昌燒臘家嗰把豬肉刀、彩虹邨華麗理髮店嘅電髮機，仲有西營盤嘅中山公園，每個畫面都有好多港人嘅腳毛，都係集體回憶。
查實跳機械舞，肌肉要好強壯先可以控制慢動作。原來創辦人須藤元氣曾經係格鬥家，2007年有次去廁所，睇到尿兜上寫住「請行前一步」，佢認為呢句話係要激勵佢，放水後決定退出格鬥界，喺美國組成World Order。之不過須藤元氣今次冇嚟，其他成員就話去過咁多地方拍片，香港融合最多文化，充滿原創性。