今屆立法會完結在即，立法會頻頻搞茶敍，噚日一眾議員就響應白鴿黨主席劉慧卿建議，喺立法會宴會廳宴請一班秘書處職員，內會主席、經民聯梁君彥仲送出兩隻燒豬贈興。
經常提出大量修訂案、搞到秘書處忙到甩轆嘅獨立議員黃毓民，出席聚會時就高舉拇指話︰「呢個like係畀秘書處嘅！」立法會主席曾鈺成聽到，即時肉緊捉住佢隻手高呼：「毓民係第一個要多謝秘書處。」即係取笑毓民經常搞到秘書處一頭煙。
曾鈺成早前喺報章專欄出數字遊戲，話答案可預告誰是下屆特首，佢開估話答案係30，但指天機不可洩漏。有網民指梁振英個名剛好30畫，但曾鈺成接受傳媒訪問時又話，林鄭同曾俊華啱選特首，唔好忘記曾主席講明，最緊要好玩！