上任3年嘅美國駐港總領事夏千福即將卸任，一向受網民歡迎嘅千福BB噚日喺fb直播20分鐘，回應粉絲提問，仲自爆下周離港返老家，結束33年嘅外交官生涯，但下月又會回港，原來係加入私人公司工作，但會保持低調喎，似乎未必再玩fb兼四出食好西咯。
夏千福一上場，就被冠以「千福BB」花名。佢話當初見到呢個花名嘅英文譯名Clifford BB，即時打冷震，經領事館同事解釋，話呢個名意思正面同善意，佢就開始好like呢個花名。
網民好關注，經常外出食好西嘅千福BB，最鍾意食乜？原來廣東菜而言，千福BB鍾意食白粥同蒸魚，仲用廣東話嘗試講白粥呢個字，結果講咗「伯爵」呢個音，補番句plain congee等大家明白。對於網民經常叫佢挑戰明將壽司，千福BB冇具體回應，只係叫大家「stay tuned」（密切留意），八方當然拭目以待。
避談李寶蘭林榮基
其實千福BB噚日直播一開始時，即以廣東話「大家好」同網民打招呼，最後又以廣東話講「後會有期」，真係好親切；但一問到嚴肅問題，就打番外交官腔，例如點睇一國兩制，佢話美國政府係強烈支持，又話支持言論自由同集會自由。
對於敏感問題，千福BB更避之則吉，包括點睇廉署高官被取消署任、如果林榮基向美國尋求政治庇護，美國會唔會幫拖？查實呢3年來千福BB都係同大家風花雪月，鮮有回應政經大事，似乎貫徹始終喎。
李八方
mailto:[email protected]