為咗錢，就算師傅叫到都冇情講。話說阿仙奴名宿亨利，𠵱家就做緊兵工廠青年軍教頭，同時兼任天空體育電視台嘅講波佬，而阿仙奴領隊雲格就開到口，叫亨利最好辭咗講波佬份工，專心教波，話唔埋幾年後雲格退休，亨利接手埋阿仙奴。不過天空體育畀38歲嘅亨利年薪400萬鎊（約4,000萬港元），咁好人工實在好難抗拒，亨利周二就決定繼當年加盟巴塞後再離隊，辭去阿仙奴青年軍教練，專心做講波佬，位置就由阿仙奴前隊長阿當斯接任。另外，英媒披露前曼聯助教傑斯將參加印度超級五人足球聯賽，呢項賽事喺禮拜五展開，踢到去24號；據講史高斯、基斯普、迪高同朗拿甸奴一班名宿都會落場。