前華姐冠軍、九倉（004）靚女執董凌緣庭（Yen）噚日一身便裝look，介紹旗下海港城又有新搞作。繼大黃鴨、叮噹展後，佢哋今次舉行藍精靈展覽（即日至8月21日），又玩集體回憶!
「藍精靈，十分勁……」，「70後」肯定有睇過呢套卡通片。阿Yen都好坦白咁講，兒時有追看藍精靈卡通，算係粉絲，跟手笑住話曝露咗自己年齡㖭。
佢指，今次展覽籌備咗九個月，過程唔易，事關藍精靈一向只做真實size模型公仔（身高19cm），但佢哋覺得咁細隻，畀人用來影相唔太方便，於是爭取做大隻啲畀大家影selfie。
而最近《Pokémon Go》大玩擴增實境（AR），引起全球熱潮，藍精靈村莊亦一樣有AR玩。
