【本報訊】BB扭計令不少父母感到心煩，但對於育有15個月大的天天母親來說，兒子扭計卻是個大進步，全因早產的天天9個月大時確診患罕見病平腦症，暫時無藥可醫。作為母親的阿平不想錯過任何一個機會，物理治療、針灸、自然療法，甚麼都去試，直至天天1歲時終於有面部表情，一個笑容足以令母親融化：「世界上唯一最幫到佢嘅人就只有媽咪，如果連媽咪都放棄嘅話，等於你放棄埋個仔，媽咪照顧個仔係天性！」
記者：張珮琪 攝影：張鼎和、梁瑞帆、周子惇
「佢一路喊，一路好似個陀螺咁會轉下，本來瞓喺床中間，扭下扭下去咗第二度。」阿平常掛嘴邊的「臭豬仔」天天，近月開始懂得扭計，但看在母親眼裏卻是無比的鼓舞，她趕緊放下家務緊抱愛兒說：「佢之前都唔識嘅，對於我嚟講其實係一個進步，而唔係半植物人咁！」
天天早產了3個月，一直躺在氧氣箱至足月才回家，但呼吸系統功能差，不懂追視、抬頭，6個月大時更患肺炎與死神擦肩而過，惟其後兒子出現眼震問題，眼球不自主跳動及常翻白眼，經檢查後證實患上平腦症，「佢個腦並唔係單一問題，佢腦白質比人少，因早產有腦積水，個頭比人大啲。醫生話佢個情況真係會好差，有機會行唔到路、講唔到嘢、睇唔到嘢，智商一定會有影響，因為佢腦部組織比人少好多嘢」。
阿平曾一度崩潰抑鬱，幸得臨床心理學家的開解，「佢講得好啱：『將來咁遙遠，你去諗都冇結果，不如好好珍惜下抱住個仔好幸福嘅感覺啦！』」阿平說，15個月大的天天目前仍像初生嬰兒，但她別無所求，只要愛兒健康不再有大問題，慢慢地成長，已經心滿意足。
兒子患病令倆夫妻更患難見真情，「由我佗住BB，到個仔出事，我老公嘅轉變好大，佢驚我唔開心成日諗啲嘢𠱁我，但其實佢自己都唔開心㗎喎」。因為丈夫是家中孻仔，自小習慣被照顧，無憂無慮，但現時丈夫放工回家還幫手做家務，半夜起床餵奶，讓她爭取時間休息，阿平深深被感動，「感受到嗰種愛嘅感覺，令我好好照顧個仔，我覺得自己都有比別人幸福嘅地方」。
除了物理治療，阿平不斷物色坊間的不同療法，甚至抱着天天中港兩邊跑，希望透過治療刺激兒子大腦，「佢唔識好似其他小朋友咁活動，我唔可以長期畀佢瞓喺張床，要幫佢做下運動」。兒子接受各種治療3個月，現時在媽媽的協助下勉強能夠轉身，但看着他努力嘗試的痛苦表情，實在令母親心痛，但當她得知外國有案例，患者懂得用匙羹進食，她深信兒子仍有希望。
相關新聞：
【永不放棄】【藍眼睛BB】 勇敢踏出人生路
http://bit.ly/29ic6ix
【永不放棄】設計師患罕見病 遭新婚妻離棄
http://bit.ly/29zgkF6
【永不放棄】生有限活無限 芷妍奮力過每天
http://bit.ly/25WboOm