【拆局】
外圍動盪震不散本港樓市，多個發展商力撐英國脫歐與本港樓市無關，全球繼續量寬，無壞消息就是樓市好消息，一手越賣越旺，面對下半年多個大盤登場，發展商一於趁勢去貨。
一手市場繼續暢旺，新地（016）元朗Park Yoho 1B期推出333伙都近沽清。樓市勢頭利好，新地急急腳即推同系Park Yoho 1C期，就連4年無賣樓的麗新發展（488）都蠢蠢欲動，計劃本季推將軍澳臨海住宅藍塘傲，正申請預售樓花同意書，計劃9月推售。
事關下半年幾個矚目大盤出場，無論位置、定價、戶型都一定搶去大量客源，包括長實（1113）荃灣西站項目、新地前北角邨項目海璇、新地與港鐵（066）合作的南昌站項目、以至中海外（688）啟德一號，均為下半年矚目新盤。