比亞迪電子（285）仲未計新拓展汽車電子瓣數，食住全球金屬手機外殼主流，主打瓣數keep住爆炸，明年得7倍幾預測PE。
比亞迪電子今年第一季盈利增長43%，到1.34億元人仔。集團主打金屬手機外殼設計生產，市場產品質感同性能上面認受性大，越嚟越普及，比亞迪電子已經贏在起跑線。
再講，比亞迪電子客戶包括華為，最新統計，華為5月喺內地手機市佔率，達到17%，穩守龍頭位置。比亞迪電子又有大客優勢，業績靚仔，唔係無道理。
又摩通報告話，比亞迪電子已經開始為環球汽車企業同一級供應商，提供汽車電子產品，呢瓣未來三至五年複合增長率，去到30%以上。
據行內分折，家陣汽車電子成本，佔新能源汽車成本大約47%，遠高過非新能源汽車成本佔比。而隨住新能源汽車市場步入高增長時代，汽車電子瓣數一樣會好爆炸，到2020年，全球汽車電子產品市場產業規模，預計會達2,400億美元。比亞迪電子又多條財路。
場內專業評估，比亞迪電子今、明兩年EPS 0.6港元同0.67港元，現價5.19元預測8.7倍同7.9倍PE，比集團上市以嚟平均12倍PE，平咗34%。當集團明年PE，追番上呢個歷史平均值，講緊要翻半番到7.8元。
錢雋
細價股專家
本欄逢周二刊出