隨住泛民猛將鄭家富盛傳會東山復出、新一屆立法會選舉再戰新界東，有關佢嘅參選部署消息亦開始流出，包括有新民主同盟嘅區議員會排喺阿富嘅參選名單上喎。吓，阿富咁公然撬牆腳？唔驚喺新東爭取連任嘅范國威，嬲嬲豬咩？
其中一個傳到似層層，話會排喺阿富參選名單嘅係新同盟沙田區議員丘文俊。八方問過佢，丘文俊一聽到就笑笑口話：「佢（阿富）冇邀請我喎。」但同時表明自己係新同盟，就算阿富邀請，「Gary（范國威）都未必同意啦！」
嗱，呢句「Gary都未必同意啦！」好易惹人誤會，所以丘文俊表明，自己積極跟進緊區內嘅水泉澳邨入伙問題，都唔會排喺新同盟參選名單㗎嘞，「Gary嗰度我都冇排啦！」唔知呢個答案，咖喱范聽咗會唔會安心咗？