飲食集團Classified Group（8232）噚日敲鑼上市，三位老闆：鋼鐵大王龐鼎元孫仔龐建貽、前律師會會長黃頌顯阿仔黃子超，同埋金山工業（040）太子爺羅揚傑，全部都係富二、三代，老闆娘亦非富則貴，不過佢哋選擇低調撐場，打扮似高級行政人員或中環OL多啲喎。
唔少內地企業老闆娘去上市儀式都盛裝出席，搶晒鏡，Classified三位闊太老闆娘就玩OL路線，最似OL嘅，應該係龐建貽太太鄭志雯，佢係新世界發展（017）主席鄭家純女兒，但佢最簡約低調，黑色套裝、冇set頭，幾乎隱身於現場近200名賓客之中。
羅揚傑太太、精品酒店話事人黃佩茵（Yenn），平時帶住下屬打理酒店，就一副行政人員look。黃子超太太、李婉菁（Charmaine）相對就最似闊太，一睇就知道有老闆娘架勢。
可惜，佢哋一敲完鑼、影完相就全部急急腳走人，唔通避免回應雜誌封面故事？