新民黨主席葉劉淑儀向來盛產男徒弟，而且大都係名校生，其中極速升呢至政制及內地事務局副局長嘅陳岳鵬同「十優狀元」教育局局長政治助理施俊輝，都係史丹福大學畢業生，但嚟緊「葉劉跑道」多咗個「男仔頭」女徒弟，就係「翻版桂綸鎂」容海恩（Eunice）。
眼大大身形高䠷嘅Eunice，原來由細到大都唔係走長髮美女路線，今年39歲嘅佢話除咗幼稚園，小學至今基本都係短頭髮，「細個個髮型都係阿媽剪」，怪不得冇乜少女孖辮look。
係林鄭中學師妹
除咗外表似男仔頭，Eunice讀嘅科目亦係男生主導嘅學科。佢中一至中五喺嘉諾撒聖芳濟各書院（葉劉「妹妹」林鄭月娥，都係呢間舊生喎）讀書，之後到玫瑰崗學校讀預科，其後負笈加拿大英屬哥倫比亞大學（UBC）讀電腦科學（Computer Science）。Eunice話從事兩年有關電腦嘅工作後，嫌加拿大生活太悶，回流香港喺城大讀Juris Doctor（JD）兼PCLL，2008年成為執業大律師。
傳以葉劉跑道喺新東「試飛」嘅佢同時愛好音樂，小一學鋼琴、小五學吹小號，閒時仲夾band兼唱埋歌，但佢唔認係音樂奇才，只係喜好者咋！
