林建岳（岳少）旗下麗新發展（488）嘅將軍澳新盤部署開賣，咁啱岳少細佬、林百欣養子林建康，都有私人投資嘅新盤準備短期內開售，仲要跟麗展同一日宣佈消息，認真巧合。
林建康過去一直同中小型發展商國際集團合組財團發展住宅，兼喺海外投資物業。林建康蟄伏超過5年，終於又有新盤推出，就係西貢洋房項目尚林。
林建康同國際集團行政總裁鄺祖盛一直係合作夥伴，佢哋2010年底賣完九龍城單幢樓松林之後，已經有5年幾冇新project。
林建康心情幾靚，罕有地評論樓市前景，估計英國脫歐後，當地樓市要跌20%至25%，資金會撤離，相信會流入香港，嚟緊前景向好。
對於未來投資大計，林建康就話，會繼續物色地皮發展，會繼續拍住鄺祖盛一齊投資，唔會獨立去做。同時睇緊日本物業，認為有投資前景咁話。