新一屆立法會選舉，佔5席嘅超級區議會功能組別，泛民爭入閘者眾，但黃大仙區議員、前綫譚香文因為攞唔到參選所需嘅15個區議員提名，無緣競逐超級議席，考慮改循九龍東出選。
雖然唔選，獲網民封政界「香香公主」嘅譚香文，都有提名權㗎，原來佢最終提名咗街工梁耀忠。唔知泛民擬出戰嘅全男班，即係民主黨涂謹申、鄺俊宇、新同盟關永業、民協何啟明、獨立陳國強同公民黨陳琬琛，會唔會呷醋？
八方問香香公主，佢話棄選超選唔代表唔出戰，59歲嘅佢擬喺區選所屬嘅九龍東披甲。其實佢上屆都試過喺九東出戰，但未能勝出；今次有乜必殺技？佢話地區政績有目共睹，而身為前綫成員嘅佢早前退出人民力量，若然真係九東出征，對手料包括前黨友人力譚得志。