今屆立法會本周五晚正式收爐，曾鈺成噚晚最後一次以立法會主席身份宴請議員、政府官員同立法會秘書處，特首梁振英、三司同多名局長都有出席，泛民陣營唔見公民黨，而工黨、民主黨同公專聯都有人畀面出席；第一道菜就係龍蝦沙律，曾鈺成真係好鬼馬。
晚宴其實只喺開始前畀傳媒公開拍攝，短短幾分鐘都睇到唔少政壇眾生相。呢排不斷寸爆「一男子」嘅曾主席，由CY進場到坐低等開飯一直貌合神離；排排坐喺主家席，開飯前一個望左，一個望右，簡直係梁班子「行政立法關係」嘅最佳寫照。
曾主席開場致辭話任內多得大家體諒同支持，自知有唔少缺失，不符官員期望，就住「為政府當局造成不必要麻煩」而致歉，希望新一屆行政立法關係會有新局面。在場「反梁黨」田北俊、林大輝就同鬍鬚曾言談甚歡，仲V晒手合照，認真應景。
CY坐冷板凳冇人理
晚宴之後安排唔再競逐連任嘅議員逐一上台發言，據聞卿姐繼續講最懷念當年八黨共識、譚耀宗就拎割瘜肉自嘲，話因為議會嘈嘈閉搞到耳仔有事，小手術變大風波喎；嫻姐則繼續向CY同張建宗「追數」。
大家有傾有講之時兼唱k，經民聯盧偉國再以色士風伴奏，政制及內地事務局局長譚志源同黃毓民、單仲偕、涂謹申合唱《難為正邪定分界》，之後又同議員合唱《朋友》，曾主席都獻唱飲歌《小李飛刀》。唔唱歌嘅就暢飲，曾主席同田北俊請飲紅酒，仲有人拎埋茅台不醉無歸，據聞民主黨單仲偕「紅都面晒」。
八方聽講，當官員議員打成一片之時，梁振英就全程坐冷板凳，不單發言冇人聽，亦冇人邀請佢唱歌，敬酒嘅都係零零落落，個零鐘頭就走人，走時仲要冇乜人知㖭呀陰功。
李八方
mailto:[email protected]