發展局局長陳茂波上電視講辣招，一再強調現在無條件減辣，但又唔肯講減辣的條件是甚麼，是否永遠不會減辣，如果係，不如早日通過立法會，將辣招變成永久法例，大家以後都唔需要再問政府幾時減辣。
但政府又唔敢，官員只想畀市民一個希望是會減辣，不過就唔知幾時以及在甚麼情況之下減辣，政府當然認為是高招，其實低到無可再低，因為沒有一個肯定答案，無時無刻都會受到專家質詢，就好似今次陳茂波接受訪問一樣，講到口窒窒，居然話減辣不科學，我只是奇怪，唔通推出辣招就非常科學化。
CY上任接近5年，在任期到之前，一定不會減辣，如果CY連任，未來5年估計亦不會減辣，屆時香港經濟環境在辣招及信貸收縮之下變得非常惡劣，將會有大量市民移民離開香港，房屋將出現大量空置。
CY無形中為下一任特首創做了減辣條件，不過，即使下一任特首願意減辣，香港情況就好似落完雨，人留客不留，就算減辣都唔能夠挽回頹勢，移民離開的人數上升，香港就會走向滅亡。
不過，對於昔日出招，今日不肯收招的官員沒有影響，他們亦有可能已經離開香港。
我亦知道，現在並非減辣的最佳時機，但政府官員可不可以講畀市民知道，甚麼時候才可以減辣。
湯文亮
mailto:[email protected]
本欄逢周二刊出