家陣乜都話網上平台，芬佬與投行賓架都要留意番喇，有間初創公司FinQuest，生意模式有如「金融LinkedIn」，可以幫手搵生意。
如果話LinkedIn係由求職者、獵頭公司同企業組成嘅話，FinQuest就係由機構投資者、財務顧問同埋唔同項目組成嘅網上平台，幫投資者搵項目之餘，亦幫芬佬搵資金，幫佢哋手頭上嘅項目盡快甩手變現。
雖然搞一個FinQuest平台，連接唔同項目與投資者，業務其實同財務顧問類似，但聯合創辦人兼行政總裁Tanguy Lesselin就話，由於網上冇地域限制，加上財務顧問一般只精於某些行業中，所以認為一個包攬各式各樣投資項目嘅平台，可以滿足唔同投資者需求。
FinQuest唔收佣，以月費方式向各方收費，年費介乎2萬至8萬美元（15.6萬至62.4萬港元）。到底呢間公司可唔可以成為下一個LinkedIn？大家不妨拭目以待喇。