炒股比賽度度都有，奇就奇在今次係騰訊（700）有份入股嘅富途證券，同港交所（388）crossover，究竟搞邊科？
呢個「港股模擬大賽」係騰訊、富途聯合主辦，總獎金30萬蚊，話係「誠意尋找港股之神」喎，目標係為內地投資者嘗試投資港股，等佢哋熟悉香港市場規則，講得明白啲，就係為深港通操練。
比賽仲由港交所特約贊助。唔出奇嘅，滬港通一周年時，港交所已經搞咗場「一周年交易比賽」，獎勵滬股通（北向）相對最多嘅券商，但冇獎金、冇獎品，得獎座咁大把。
呢個港股模擬比賽由今日（11日）開始，一直到9月尾。每個月係一場獨立賽事，初始資金50萬元，最終計算3個階段總收益排名，每個月就有階段性排名獎、每星期收益率亦會計數，同樣有獎。
贏家除咗有30萬蚊現金獎，同騰訊QQ超級年費會員服務之外，每個月排名頭三位、以及總排名頭三位都可以獲得豐富現金獎，可以透過騰訊QQ、富途證券、富途牛牛報名玩。