金山工業（040）老闆羅仲榮位公子羅揚傑有份創辦嘅飲食集團Classified Group（8232），今日創業板上市。睇番通告，呢間公司吸引到10名大戶投資，最大手筆嗰位，斥資接近1,500萬元認購，持股6.8%，由於超過5%，遲吓可能要現真身㖭喎。
Classified Group主要經營11間「Classified」，仲有「The Pawn」與「SML」各一間，公司上市集資7,700萬元，其中大股東賣舊股套現3,300萬元。
大股東除咗有羅揚傑，仲有前律師會會長黃頌顯阿仔黃子超，同埋新世界發展（017）主席鄭家純女婿龐建貽，都係富二、三代。
根據公司通告，有10名投資者認購咗500萬股或以上，其中一人投資近1,500萬元，其餘9人，最少都要拎422萬元買股，認真畀面。創仔股出名股價以倍數爆升，唱歌有《十個救火的少年》，呢10位仁兄，隨時變成「十個再發達的中年/老年」！