港超聯盟主東方早前公佈簽入港腳麥基、梁振邦及澳洲外援米曹後，正斟介曾效力西甲畢爾包及伊巴嘅33歲前鋒米基爾阿路巴連拿（Mikel Arruabarrena），而我求大俠睇番呢個前鋒球員生涯履歷，級數可能仲高過前傑志隊長、當選過「香港足球先生」嘅盧比度。
東方上季壓倒傑志奪港超冠軍，新季除咗要肩負衞冕重任，仲要踢亞洲球會賽。雖然未知踢亞冠盃定亞協盃，不過球隊方針都一定係加強實力，除咗加強華人班底，亦計劃簽入有份量嘅外援，至於搵咩外援，高層認為西班牙外援比較有保證，所以透過經紀揀咗做過西甲球會伊巴隊長、踢法好全面嘅米基爾阿路巴連拿。
西班牙經濟差有筍貨
其實本地球會搵狂牛兵始於2009年，傑志搵咗前巴塞足球學校總監甘巴爾做教練，佢帶嚟嘅狂牛兵大多都好實用，價錢亦唔貴，月薪大約係5,000至6,000美元（約39,000至46,000港元），簡單嚟講就係價廉物美。之後，南區同夢想駿其都搵西班牙外援，南華早前亦搵咗前馬體會前鋒巴拿里奧試腳，點知南華冇查清楚佢原來曾涉性侵同有襲擊紀錄，雖然冇入罪，但係都即刻送佢走。
我求大俠早輪同傑志總監兼教練朱志光傾過，佢話球隊今季會繼續搵西班牙新援，可能因為當地經濟麻麻，唔少球會傾向唔再同啲年紀大、薪酬高嘅球員續約，所以可以搵到啲西甲同西乙級數嘅外援，年紀亦唔算好大，只要適應到香港環境，應該幫到球隊手。
睇番近季嚟港嘅狂牛兵，部份相當實用，亦好有職業操守，好似傑志嘅丹尼、列斯奧同佐迪，好波兼勤力，幫傑志攞過唔少好成績，之後嘅迪亞斯同埋未傷前嘅卡里爾亦唔錯。至於上季嘅南區中堅加拉度、夢想駿其隊長柏保美同傑志前鋒羅勳奴表現有目共睹，今季東方、南華同傑志三大豪門都搵狂牛兵加盟，一眾狂牛同鄉有望同場較技。
畢包出身威過盧比度
講番呢位好大機會加盟東方嘅前鋒，出身於西甲名門畢爾包，仲升過上一隊，之後轉會去奧沙辛拿B隊，又踢過特內里費，之後去咗波蘭搵食，09年球季重返祖家，加盟伊巴呢隊西甲尾、西乙頭嘅球會，幫過球隊重返西甲之餘，仲做埋隊長，但上季中俾球會借咗去西乙。求大俠睇過佢啲比賽片段，呢位身形高大嘅前鋒踢法全面，頭槌同埋門都好實際，仲有二傳能力，論級數仲高過盧比度，至於東方係咪簽到呢位狂牛中鋒，據東方總監梁守志講，好快有答案，留意住佢哋個fb咁話。