首位韓星挑戰「人人問」,佢係邊個?~~少女時代成員孝淵。上回有蘋民問到:「聞說韓國人出埠要帶泡菜,唔知孝淵你有冇帶呢?可唔可以睇吓你個手袋?」點知!孝淵竟然有求必應,即刻叫工作人員攞自己嘅Chloé黑色皮手袋,笑住話:「我手袋無泡菜!」
孝淵無隨身帶泡菜,但係就隨身帶住一本日記簿,訪問當日帶住嗰本,印咗孝淵嘅名「HYOYEON」。孝淵話小學就開始寫日記:「每過一段時間我都會翻睇啲日記,例如睇吓做練習生嘅日子,睇返會湧起好多回憶,所以覺得寫日記好好,亦都好自然養成呢個習慣。」
孝淵嘅手袋當然唔少得有化妝品,以備不時補妝,加上今次做咗美國化妝品品牌代言人,手袋就當然有眼影同埋胭脂唇膏兩用筆。另外,孝淵仲有帶薄荷糖、香水,同最緊要嘅耳筒!孝淵話,「我成日聽音樂,尤其喺飛機無聊嗰陣,要聽歌、睇片、睇戲,所以耳筒係必需品!」但係點解佢手袋無逃生三寶:銀包、電話同埋護照嘅呢?有助手真係好!
孝淵摷完手袋,繼續出招冧香港粉絲,即場問繙譯:「教我一句廣東話同香港粉絲講吖!」繙譯就教孝淵講「我愛你哋」,孝淵仲即刻重覆講咗幾次「我愛你哋!」,然後好開心咁話:「今日終於學到一句廣東話喇!」真是冧死粉絲!
為感謝孝淵全程有問必答,動主播阿仙仲準備咗香港特色小食--雞蛋仔同奶茶作回禮,孝淵巧驚訝咁指住雞蛋仔話,「我第一次見!」睇嚟孝淵今日有嘢寫落日記簿喇!