7月14日係全城愛蝶日，行會成員陳智思同環境局副局長陸恭蕙連續第4年為綠色力量擔任「蝴蝶大使」，活動今年特別聯乘著名木雕藝術家王天仁，利用廢木升級再造多件大型蝴蝶同蟲蟲藝術品，陳智思同陸恭蕙各自喺木蝴蝶上色，身體力行撐保育。
陳智思藝術系畢業，擅長用塗改液作畫，今次迅速「點出」自己嘅黑白木蝴蝶，相當有型。原來陳智思刻意以型格取勝，佢話行山時成日見到蝴蝶，正因常見反而會忽略保育佢哋嘅重要性。陸恭蕙畫嘅蝴蝶就五彩繽紛，令呢隻木蝴蝶栩栩如生，佢話大自然所有生物都息息相關，生物多樣性非常重要，希望各界多加關注。佢哋聯同其他大使嘅作品，下月中喺《BUTTERFLY WONDERLAND觸木蝶變》展覽巡迴展出。