有成四千年歷史嘅筷子相信大家每日都會用到，點揸、點為之識揸筷子？真係唔係人人都咁講究。早排網上有人話：「我係比較隨意，其實我覺得唔識揸筷子又點，用到咪得囉。」仲引起網民正、反兩邊熱烈討論。不過依家生仔教仔都要贏喺乜乜前，要喺飯枱上突圍而出，又點可以唔識揸筷子呢？
我哋蘋果動記者今次出動走訪街頭、訪問吓陳寶珠(寶珠姐)、梅雪詩(阿嗲)同陳柏宇，考吓佢哋揸筷子，問吓佢哋對呢門餐桌禮儀有乜睇法。精於揸筷子嘅寶珠姐同阿嗲就覺得：「正確揸筷子好重要，例如你去一個好大嘅場面嘅時候，你揸到咁(錯誤示範)，你話幾難睇、幾唔尊重個場面呢，所以一定要揸得啱。」
雖然係番書仔，但一樣揸筷子揸得好正宗嘅陳柏宇話：「我好叻㗎，因為細個揸筷子揸錯會畀人罰，會罰收玩具，最後收淨條橡筋繩。不過我唔會理人哋點揸，因為呢個係一種tool(工具)，用到就得。」
唔同層面嘅名人、藝人都對「贏在飯枱前」有唔同睇法，而班街坊都一樣喎，睇到班學生街坊們唔識揸筷子，佢哋都知自己揸得唔啱、唔正宗，但都認為用到就可以，唔需要去學正確嘅方法，甚至有人話自己嘅家長都唔識揸，所以點學喎。而幾位媽媽級街坊則覺得要識揸筷子，倪小姐就話：「我媽咪都有教我揸筷子，真係一種家教。」Andiea：「識揸筷子係素質教育。」徐小姐：「阿媽有冇教你，就係睇同人食飯嘅時候，睇到你有冇禮貌同禮儀。」而有位爸爸就話自己唔識揸筷子，所以教唔到個仔。另外有嚟咗香港14年嘅老外，覺得學識揸筷子唔難，仲會教埋子女點用添。
其實連「外國勢力」都識嘅餐桌藝術，作為Hongkonger嘅你又點可以錯過「贏在飯枱前」嘅機會呢？不如大家即刻去片，學吓點正確揸筷子啦！
採訪：植詠珊 Cathy
攝影：Neo