民建聯立法會議員蔣麗芸，噚日朝9點喺立法會開會期間，突然氣沖沖走去走廊記者席，投訴發生「失竊案」，話有人偷咗前廳嘅《蘋果日報》、《東方日報》同《明報》A叠港聞版，保安梗要跟進！不過《蘋果》攝記發現，拎走報紙嘅竟然係建制自己友、工聯會王國興，俾人當賊扮嘅MC興當然好㷫！
話說元秋噚日朝搵報紙睇，話想睇長沙灣大火報道，點知三份報章A叠俾人拎走咗，元秋好勞氣，話之前發生過好多次，佢覺得真係好過份！前廳疑似有賊，保安梗係立即到場，雖然保安一度話可提供後備報紙，但元秋話呢個唔係有冇報紙睇嘅問題，係公德心問題，攞走晒報紙，其他人咪冇得睇，係非常不要得……不過保安話前廳冇閉路電視，難以睇到乜人偷報紙，元秋即時話︰「咪逐個議員問囉！就算查唔到都要警惕啲人唔好再咁做。」
「好多議員都咁做」
保安查唔到，不過《蘋果》攝記發現，工聯會王國興曾手持多份報紙入會議廳，仲攤開慢慢睇，咁八方就問MC興有冇拎走前廳報紙，MC興即時承認，又話一小時後已放回原位，又解釋因為要應付拉布，不可能離開會議廳睇報紙。對於元秋大興問罪之師，MC興話佢小題大做，又話好多議員都好似佢咁做，睇完就放番原位，其實每個議辦都有訂報紙，不過要趕住開會，當然唔及喺前廳攞嚟睇咁方便！
李八方
mailto:[email protected]